2008年12月24日星期三

激似版 mrs field cookies



係親子王國搵到這個食譜, 馬上要試吓所以將原先的材料減半做一次, 而有網友提過太甜, 所以我自行將糖的份量減少. 做起放涼即試味味道唔錯不過係無煙 um的
感覺, 有網友講要加粟膠, 我記得曾經在烘焗材料店見過. 好下次再去時買黎試下. 食落味唔錯, 而且很鬆化. 正!!

mrs field cookies (激似) (可做 9 件)

材料:
牛油 65 克
白糖 40 克 (原食譜為 65)
黃糖 40 克 (原食譜為 65)
雞蛋 1/2隻
鹽 1/8 茶匙
雲呢拿香油 1/4 茶匙
麵粉 114 克
泡打粉 1/4 茶匙
梳打粉 1/4 茶匙
麥皮 5/8 杯

做法:
1.先將麥皮打成粉 (可用食物處理器打碎),備用
2.將牛油、糖、黃糖打成忌廉狀,加入雲呢拿香油及雞蛋打勻
3.加入麵粉、泡打粉、梳打粉、鹽及麥皮粉拌勻
4.造成球型再壓扁,用200度焗7-8分鐘

其他果仁加自由配搭......

2008年12月23日星期二

兩款麵包機大比併 - 無蛋無奶白麵包


這個是用 CATNAPPER 代訂的麵粉 KENWOOD 機做



這個是我請 CATNAPPER 用她的麵包機 MORPHY RICHARDS做


這個包整出黎缺左角....

之前網友 CATNAPPER 幫手訂了麵粉約好星期天交收, 有小小唔意思的情況之下要求 CATNAPPER 用她的麵包機做一個麵包比我試食, 本來我預算是計回材料錢而 CATNAPPER 好好人提意不如交換包包就不用計, 我當然高興啦!! 咁大家都有包包可以試食.

我是用開日本粉的, 只因方便我買的地方只有日本粉, 所以做出來與 CATNAPPER 的有所不同詳情可以到 CATNAPPER 的 "2款麵包機 - 成品比較" 了解一下.

今次再做一次用了金像粉做的, 成品做出黎唔知點解歪左缺角, 側邊表皮比較燶, 頂頭的表皮跟之前做的顏色差唔多, 切開後 CATNAPPER 的麵包機做的密度比較平均及高, 而我部機做出的效果做出黎就比較起好似夠平均頂頭比較多洞洞, 而近底部的位置就比較密. 而外觀大小我部機做出黎好像比起 CATNAPPER 的包包大小小.

本來一心想昨晚就做好個報告, 點知昨天公事太多遲了放工, 做起個包時已經十點幾十一點, 所以沒有再等落去.  所以今早才試食, 我一手係自己的包一手係 CATNAPPER 的包左一啖右一啖咁食, 食落沒有太大分別, 跟住食左自己個件, 再食 CATNAPPER 的一件, 就覺得自己個件比較軟身, 而 CATNAPPER 個件就扎實一點不過好輕微, 不過要記住這個比較是兩個件麵包的比較.

總結一句其實差別真係唔多, 兩個包包都是可以做到會跟街買回的包包一樣......



2008年12月22日星期一

一門三傑 (腸仔包+香蔥火腿包+罌粟籽-麵包機搓粉)


囡囡開始放假, 我亦開始可以輕鬆一吓, 因為囡囡今日開始會返公
公婆婆家住, 我又可以偷懶, 想點做就點做.... 所以昨日整好一門三傑讓囡囡帶回公公婆婆家.

終於可以一賞用麵包機搓粉及發酵再做整型麵包, 感覺方便得多我是用無奶無蛋的麵包機食譜做 放晒材料落去按搓麵團的情序後, 就可以等麵包機叫即可完成第一次發酵的情序, 時間大約是個半鐘, 取出後搓了幾下再壓平一點再分開八份, 我好貪心一次做幾個唔同樣的包包, 有腸仔, 罌粟籽及香蔥火腿包.

不過中途發生了小意外, 原意是一次過焗包包, 但是因為腸仔解凍後仍然凍冰冰我照卷麵團, 所以令到第二次發酵時間比起其他包包為慢, 所以要分開焗.
放涼後入袋留作今天的早餐, 今天和囡囡一起只食了腸仔包, 當然有腸係度包做得如果都無所謂, 其他的包包我就無緣試食, 比囡囡帶回同公公婆婆一起享用, 唯有等囡囡的報告.

2008年12月19日星期五

白麵包 (無奶無蛋 - 麵包機做)


又做左白麵包呢個又係跟龜仔做的.....


呢個勁似街外的白麵包....

原本昨天想做洋蔥包, 但是掛住同囡囡傾計唔記得左買, 唯有又試下用現成最簡單的整包包...... 今次算係跟足情序做, 只是 set 左時間今早起身有得食, 但是我 set 時間的時候又出左偏差, 原本打算可以起身時仍保溫, 但是 Set 早了小小, 所以取出時包包底部已經有焗到有小蒸汽的水份, 但不是太濕.

這個包包激似街買的包包好好味, 不過可以再咸小小就最好.

食譜可參照 龜仔食譜

2008年12月16日星期二

提子包 - 麵包機(中種)


第一次做中種焗看似不錯
但是又忘記改回低烘
表面比較深色.

切開入面好軟熟
不過提小分佈得不太平均......

因為今日去囡囡學校開會, 所以有小半日時間可以開工做包包, 今次我又係攪整一通, 用專業麵包制作的食譜再加埋我天馬行空的想像力整包. 本來想攪起麵團後一半用作做提子包另一半用作做囡囡的至愛品品包(香蔥火腿包因為型狀似品字所以囡囡會叫佢品品包), 差點兒就失敗了, 所以現在只能全部做提子包......

好擔心會失敗, 因為始終不過跟足食譜做而且我係攪完第一次時發覺水份太多又再加粉...... 不過出來的成品也不錯, 試食後感覺就好似我做方包時晤打晤撞攪二次的效果, 今次都很成功.....

提子包 - 麵包做 (中種)

                             中種                     主麵

高根麵粉            280 g                     170 g  
糖                           12 g                       48 g
奶粉                         6 g                    
酵母                         2 茶匙
溫水                     320 g
牛油                                                    50 g
蛋                                                           1隻 (約 50g)
鹽                             1 g                         1 g
提子                                                   120 g

先將中種部份放鋼盤內攪勻用保鮮紙蓋好進行發酵 4-6 小時或過夜, 發酵完將中種麵團放入麵包機後再加入主麵團 (提子除外), 按制作甜麵包制待麵包機發出第一次響時放入提子, 中烘焙 750g.

2008年12月14日星期日

哥哥結婚了......

實在太興奮了......哥哥終於結婚了...... 不知道是否心情興奮還是肚子有點餓, 本來這個時間應該已經就寢了, 相信識我的 bk 網友都知我現在健康到不得了, 早睡早起, 可是無論如何也沒有辦法安瞓. 只好起床食自己用麵包機做的方包, 咬著自己做的方包還是這麼軟及充滿水份, 食過以後希望可以幫助入瞓. 可是仍然是眼光光. 唯有寫一下網誌, 希望可以快一點入睡.

當我知道哥哥結婚的時候沒有祈望或興奮的心情, 只是覺得都係時候了..... 好像很久也沒有參與親戚的婚禮, 最近的應該是表姊女兒在港補攞喜酒, 但是是小型得三團不算得上是喜酒, 再對上一次應該係堂阿哥結婚不過已經好多年前的事, 雖然這次只是先註冊, 出年才會攞酒, 可是我好像被現場的氣氛感染了相當興奮.

今天一早起床, 如常梳洗之後到街市入貨, 回家後便催促一大一小起床梳洗, 之後去飲茶再回家變身. 雖然昨晚已經找了一批衫準備今天著, 可是我換來換去也不樣像樣, 因為原先想著的一件衫找不到, 最後是因為再換落去會遲到, 所以我放棄了, 衣著上有點草草了事的感覺.

當我們抵達了紅棉路那邊的公園的時候遇上了爸爸, 我還以為他們在拍照, 誰知原來爸爸如廁後迷了路, 好在遇上了我們. 當時爸爸火光著了不停催速我們 "行快 d", 爸爸你知道當時還有半小時才到註冊的時間只需用幾分鐘的時間已可以抵註冊處的大門, 放心啦.......還有很多親戚也未見踪影呢!!

今次真是很多人到來觀禮, 點解會有咁多人? 當然是因為有餐食, 原先只是想親戚及幾位好友在相鄰的餐廳有個小型酒會. 哥哥不知就裡告訴了一些貪心的人, 他們直接了當問可唔可帶埋屋企或者是女朋友. 後來哥哥才發現這些人是因為有免費東西食才到來, 原先預算十多廿位的人數, 結果變了六十人.

就這麼多人迫在一個小小的註冊地方真是辛苦了大家, 每行坐位裡的人都變得好親密. 簽紙過情變得好趕時間, 原因是伯父還有姨媽都各自因為某些原因遲大到, 沒有辦法他們年紀也不小了, 雖知紅棉路的斜路真是很斜, 對於老人家來說真是不容易, 時間一路拖住, 職員亦都不斷催促, 在不能再等的情況之下進行儀式. 雖然兩位老人家到來的時候兩位新人都簽過紙只餘下雙方家長未簽名, 但總算見到兩位新人的開心樣子. 而我亦都變得相當興奮, 我終於都有個嫂嫂, 女兒就多了一位舅母, 大家都很開心, 而我父母亦都了左件心事終於有新抱茶飲.

酒會過後本來想去工展會, 但是已經是四點多, 如果再行落去會很夜才可以回到家, 我又要一早起床, 所以放棄了沒有去到. 誰道結果都是一樣夜瞓, 因為實在是太興奮.



2008年12月13日星期六

白麵包 - 麵包機做(正常)



今次用正常的做法做
焗完的成品外觀唔夠鬆軟......



好在入面都係咁軟
比起上次搓兩次份的麵包成品沒有咁高....

再接再勵做一個正常跟足食譜做的麵包, 不過我今次用多左 15g 的奶, 因為奶剛剛用一盒屋仔奶, 所以全部加入去, 大家會問加多左奶會否做不出麵包. 我唸唔使我講都知係得..... 我前日搵資料時發現了一個網站是這樣寫的, 為何用麵包機做出來的麵包會唔夠鬆軟. 是因為要睇麵包機的產地. 相信大家都知外國的麵包係好似石頭咁硬, 外國人食麵包時會將麵包番熱食, 但係好似東南地區的人大多數都是隨手攞起食, 很小會番熱麵包. 所以外國牌子的麵包機所跟的食譜都是跟外國人的飲食文化做. 就是這樣的差距很多時跟機的食譜做出的麵包比起在街的買的麵包為硬.

話說回來今次的麵包出爐時樣子比較起搓兩次粉的樣子沒有這麼漂亮, 不過佢地密度就比起上次的更好, 仍然要比個 "正" 字.

食譜參照 白麵包 (超軟) 食譜 做, 奶+蛋為 300g

2008年12月11日星期四

白麵包 (超軟) - 麵包機做 (搓二次麵團)


再戰白麵包......

今次又跟龜仔做, 做出的效果是好軟.....

晚開機做麵包, 今次又跟龜仔做, 出來的效果真是跟買回來的沒有兩樣, 好軟熟好正, 不過我攪麵麵團時有所改動, 傳說中用麵包機做出的麵包是不夠柔軟, 需要攪三次才可以做得好, 所以我昨晚先開機做攪麵團, 到攪好麵團時關機, 再重新開機並預軟好今早起床時焗好麵包. 不過我計的時間有所偏差, 所以當我起床時麵包還在烘焗, 未到廚房已經有陣陣的麵包香味. 雖然好心急但是無辦法唯有去梳洗換衫, 跟住麵包機係度呱呱叫, 好開心將麵包倒出, 成品發到很高..... 成功左

白麵包(超軟) - 麵包機做
材料 :
蛋一隻加鮮奶 285g
無鹽牛油 20 克 (預先用熱水坐溶)
高筋麵粉 350g
鹽 1 茶匙
糖 3.5 茶匙
酵母 1 茶匙
做法 :
  1. 麵包機設定:程式(1)白麵包,麵包分量:500克,烘焙度:低度。
  2. 除了牛油粒外,將所有材料依以上次序放入麵包機焗盆內,將焗盆放回麵包機內,按開始鍵。
  3. 當麵包機運作 5 分鐘後,在停止的 5 分鐘內,用橡皮刮刀將牛油像塗麵包般均勻地塗在麵糰上。(如不用牛油後下法,可如正常般將牛油座溶加入牛奶中便可)
  4. 當搓完粉時是, 關機之後就 SET 時間預好要食的時間程式跟 (1.) 再開機即可.
  5. 程序完成後,將麵包取出放涼架上放涼最少30 分鐘,切片。
特別嗚謝 龜仔 食譜.

P.S. : 另外建議麵包等完全放涼才切比較好, 因為天氣乾燥會切開麵包後入面的水蒸氣會流失, 可能會加快麵包乾硬化.


2008年12月10日星期三

奶油麵包 - 麵包機做

焗完出黎個樣唔係好得.....


切開又唔係咁差, 密度很高.....

昨晚又開機包包, 點講都好新機梗係要試清楚啦. 如果有問題可以換番, 今次急時間咁做, 用跟機食譜做, 用左包已開封但沒有存放在雪櫃裡的酵母, 等發酵時一點動靜也沒有, 只是發大了一丁點, 真是有小小擔心會失敗會失敗. 好在後期已經好好多, 雖然不是發到很大. 昨晚太夜所以放係廚房放涼, 又叫總經理瞓前放好包包. 

今早將它切開時發現又唔係咁差, 表面看上去有點硬, 但是試食後又不是硬, 而且裡面都好軟身有豐富的牛油味道, 尚算成功.

奶油麵包 - 麵包機做

鮮奶 130g

雞蛋 1 隻

牛油 (已溶) 80g

高筋麵粉 350g

鹽 1 茶匙

糖 30g

乾酵母 1-1/2 茶匙

跟上列次序加入麵包機桶, 用程式 4 (甜麵包程式) 按 500G 中度烘焗.

2008年12月9日星期二

薄荷雪糕拌涼粉


雖然這個食品不是太過合適這個天氣為免日後會老人痴呆忘記了這個食品, 雖
然遲了一點但是我仍會把它在這裡. 
涼粉是夏天又便宜又消暑的食品配合薄荷雪糕更是涼透心. 小時候家裡練奶是必備的, 用作沖好立克及華田, 又或者用作浸梳打餅食. 所以食涼粉的時候很自然便會加練奶, 非常好食.
用雪糕拌食倒是第一次, 效果也不錯. 另一種食法是飲茶時食到, 加西米露雜果同樣美味.

涼粉拌雪糕
涼粉 一個 (用刨刨成幼絲)
雪糕 (任何款式)

兩者合二為一即可......

2008年12月8日星期一

麵包機初體驗之白麵包 (無奶成份)


托左番屋企搵左靚位放好佢先.......



急不及待打開黎睇吓佢點攪麵團


發酵緊的樣.......


登登登....... 登...... 三小時之後就爐啦.....


放涼左半小時之後切開, 入面仲未凍晒只好放係度.....

係親子王國入面由豆漿機討論, 到麵包機再到光波爐,
原先係唸住換豆漿機, 因為本身部豆漿機仍然健左, 所以最終經運輸部總經理(老公托佢嘢回家總要經過你手) 同意下將麵包機買下來. 原本可以送貨, 但係我已經忍唔住要即刻將佢帶返屋企, 所以要運輸部總經理代勞, 唔該晒.

我左唸又唸再問吉仔售貨員後決定帶 Kenwood 回家, 回家後立即洗一洗個桶就開始左整麵包, 原本想試下跟機食譜, 但是全部都要加鮮奶,
我家已經好久沒有買鮮奶, 想起 BK 媽咪話龜仔的食譜無用鮮奶的, 所以即刻上網搵, 好在我個寬頻仲未死可以上到.
開機後我們出街食飯
慰勞一下運輸部總經理, 飯後回家麵包機依然工作中. 一邊看電視一邊等待之中麵包機已經發出陣陣香味, 老公忍唔住對我講 "頂.....
好鬼死香攪到我好肚餓" (大家要記住我們食完飯不久). 囡囡就更加心急, 不停入廚房偷窺麵包機如何做包包.
等啊... 等啊...麵包機終於在叫香噴噴的麵包終於完成. 我放涼小小切開試食, 和街買的麵包比較起來效果差唔多. 老公偷偷入廚房撕了一小片食, 跟住同我講唔夠咸, 係無錯, 因為我無跟食譜磅鹽份量, 只是我隨意加入.
囡囡見到爸爸偷食, 但係包皮就比街買回來的好食. 囡囡以後食方包最憎食包皮, 但係今次做出來囡囡竟然話好食. 正明左我無買左部機.

2008年11月27日星期四

Pancake 粉做的夾餅 (7 仔窩夫機)


新糞坑三日香左的 7 仔窩夫機做的夾餅從見天日, 最近
被 BK 網友提起又再發功用黎整夾餅, 今次懶過鬼用左現成的 pancake 預拌粉加水做, 成品當然係 pancake 味。
但是做起出來因為沒有脹起所以比較扁平。 原本打算送比一個 bk 友, 但是我老細 (阿囡) 話食架, 佢個一句話你等我出個時做好熱辣辣好好食
(即是早上等佢起身梳洗之後換衫時做), 所以部機又重見天日...

Pancake 粉做的夾餅
Pancake 預拌粉 (白翼) 1/2 杯
水 適量

將 pancke 粉放份量杯, 加水至3/4位置, 攪拌一下再加水至 3/4 (因為粉會索水) 再攪拌, 靜止十分鐘待粉有時間可以吸水,
靜止後如水份仍未到量杯 3/4 需要再加水至 3/4 再靜止, 之後開機倒入粉漿即成, 不過小心唔可以放太滿, 太滿便會如圖中所見滴出賣相不好。


西多 (阿 SO 的做法)


呢個就係阿 so 介紹的西多, 真係無介紹錯好正,試左真係好好。
以前曾經試整過, 做出黎效果麻麻。 原來加雞蛋+牛奶的做法非常好味, 不過大家要小心,
咁食法都幾肥。我跟阿蘇一樣係好鐘意食麵包時加很多牛油, 所以要有節制做這個西多, 如果次數太多, 肥左就唔關事啦。
西多 (阿 So 做法)
厚切白麵包 三片
雞蛋 一隻
糖 二湯匙
鮮奶 適量
牛油 適量

先將蛋糖鮮奶攪勻, 再將麵包切成三角型, 逐片麵包放入蛋漿浸一浸等麵包吸收蛋漿, 用平底鑊放燒熱油大約有麵包放平的一半高度, 將索滿蛋漿的麵包放入轉細火慢慢煎至兩面金黃即成, 食時加入牛油就即成美味的西多。


2008年11月20日星期四

豆渣煎餅


整完豆漿小不免有豆渣, 有時掉了又覺可怕所以跟大家整下豆渣餅, 唔食真係唔知, 1來好味也不錯。 豆渣除了做煎餅外, 也可以當磨
沙咁用, 用豆渣磨完之後皮膚都滑了。 做煎餅變化非常多, 可以配搭唔同材料已經有唔同較果, 又好味又無會浪費食物。
豆渣煎餅
豆渣
麵粉

將三樣材料攪勻, 攪至糊狀 (似 BB 糊仔咁), 之後燒熱油鑊, 用一湯匙放份鑊同時整至圓型, 兩面煎至金黃色即成。
P.S. 因為大家做完豆漿後的豆渣濕度不一樣, 所以沒有指明份量, 大家可以按住自己做出黎的份量試下就會知道用幾多麵粉.  

2008年10月27日星期一

自家制豆漿 (黃豆+黑豆+茨實)


自家制豆漿忽然簾捲全國, 對於平日常常被電視洗腦式灌輸牛奶有幾好, 自從毒奶事件出現在提起牛奶很多人都會人心皇皇。 取而代之的是豆漿-營養豐富被
稱為中國人的牛奶更是不二的選擇, 而自家制的豆漿更是首選。 今時今日做豆漿方便我多,因為有自動豆漿機,我地簡單方便每日自己做新鮮的豆漿。

在國內更是賣個滿堂好的自動豆漿機, 有部份的地區更是賣斷市。 全自動豆漿機的出現更為忙碌的香港人帶來不少的方便, 二十分鐘不到的時間已經可以享用, 早上起床什麼事也不要做, 最重要是把昨晚浸水的黃豆洗一洗再放入豆漿機後開動跟著安心梳洗更衣再做早餐, 早餐還未做好豆漿機已經在呱呱叫。

自家制豆漿 (黃豆+黑豆+茨實) (用威馬做)

黃豆及黑豆 各半杯 (用豆漿機附送的量杯)

茨實磨粉 2 茶匙

先將黑豆白鑊炒至皮爆裂備用, 將黃豆及黑豆浸水至發大一陪六小時, 途中要換水三至四次以免發嗅, 將豆及茨實粉放入豆漿機加水後, 只要按一下制, 等豆漿機嘟嘟叫, 就會有新鮮的豆漿飲.

p.s.  這個做法要多謝網友火石的介紹加茨實可以補腎,另外黑豆炒過可以去寒.

2008年10月1日星期三

蝦醬蒸豬頸肉


相信很多人都抵受不過蝦醬的誘惑要多添一碗飯,而蝦醬蒸豬腩肉更是美味無窮, 而用豬頸肉蒸蝦醬就是肉檔老闆娘的推介。 大家知唔
知豬頸肉是豬的什麼部位呢? 就是豬的面黎架,
一隻只能起到大約四件左右的豬頸肉, 所以如果想做這道菜大家就要早一點起身去街市買。 因為豬頸肉都幾受歡迎, 很快就賣完。
蝦醬除了蒸餸外還可以炒通菜牛肉都是非常美味可口, 但係大家使用蝦醬煮餸時記緊要落鹽唔好咁重手, 否則就咸都阿媽都唔認得。 所以煮餸的重點大家又知唔知? 就是要試味, 無論你有幾新鮮幾貴的的材料都好, 如果大家煮餸是永遠都試味,那麼你最好放棄吧了!
蝦醬蒜豬頸肉
豬頸肉一件
蝦醬一茶匙
豉油適量
糖適量
粟粉適量
將以上材料攪勻醃最少半小時以上 (過夜仲好),  將醃好的豬頸肉放上碟, 燒熱一鍋水, 大火蒸十分鐘即成.

2008年9月18日星期四

肉片炒公仔麵



炒公仔面好難, 點炒都不能做出像茶餐的乾身, 油放得小又黐在一起, 油放多了食時又油膩。 是否因為家裡的爐火不及茶餐的火力? 究竟怎樣才可以做到呢?
真是有點衝動想跑進茶餐的廚房偷師。 如果大家有好方法記得話我知。

肉片炒公仔麵

肉片 適量

一叮麵 一包

豉油 適量

蠔油 適量

醃料 : 豉油, 糖, 粟粉及油

先將肉片加醃料, 醃最少半小時備用, 燒熱一鍋水一叮麵加小許油大火煮二分鐘四十至五十秒, 取出隔水備用。 起油鑊炒肉片至半熟取出, 將一叮麵大火快炒加入豉油及蠔油炒勻, 最後將肉片回鑊同炒即成。

2008年9月2日星期二

薄撐




薄撐說穿了原來一個很容易做到的小食, 從前總會想薄撐是用什麼材料做呢? 有小小黐口又有咸香, 是否喜歡的食物一種, 總食完一件又一件嘴巴總是停不
下來. 我記得以前在超市有一包包現成的賣, 只要加水便可以煎成一片片的薄撐, 味道也不錯, 對於我來說份量真是比較小. 我想要起碼做二至三包才可以滿足我的口欲.

薄撐

糯米粉 半碗

粘米粉 一至二湯匙

蝦米 適量

蔥粒 適量

鹽 適量

水適量

將所有材料攪勻, 留意水要慢慢加, 攪至麵糊可重筷子或匙緩媛流下成一線即成, 燒熱鑊加小許油 (不要太多否則食時會非常油膩), 用湯穀慢慢倒入鑊裡成薄薄一層, 煎至面表金黃再煎另一面即成.

p.s. 粉的比例可按自己的口味調整.

2008年9月1日星期一

自制粟米湯


自家制粟米湯超甜超好味, 夏天在街市常常會見到又大又甜的粟米賣, 買 $10
已經有 4-5 支, 可以分 2 次煮這個粟米湯。 比起買地 X 的粟米湯好得多, 因為而家的地 X 粟米湯很多渣又小粟米。 如果自家制就要花時間去拆粟米及打蓉。

自家制粟米湯

新鮮粟米 2-3 條

雞蛋 1 隻

鹽 小許

將粟米用切出粒粒粟米, 將一部份粟米打碎 (用攪拌機) 另一部份留起, 燒熱一煱水將粟米蓉及粟米粒放入煮半小時, 加入打勻的雞蛋及鹽調味, 再加小許生粉獻或淡忌廉即成。

2008年6月9日星期一

自製 xo 醬伴麵



多謝桼哥教網友做自制 xo 醬味香材料足, 比起在市面上買
到的更好食更便宜, 非常適合伴麵、煮餸及炒公仔麵時使用。 從前在電視上見過一個真人 show 學做菜時, 在短短的時間介紹過材料及製作法, 但是由於太急趕沒有時間抄下食譜, 所以沒有嘗試過自家做。 其實說穿了製作法後也不是太複雜的事, 只是需要多一點時間浸發部份材料。



自製 xo 醬 (特別嗚謝 : 櫺囹桼 提供食譜)

a)材料
1)干貝4兩(用細細粒之瑤柱仔就可以約24元)
2)蝦米2兩(約12元)
3)
蔥頭四兩
4)蒜頭四兩
5)乾辣椒碎  適量 (原食譜為新鮮辣椒碎, 因為剛好有在日式超市買的乾辣椒碎)
6)生油2碗(我習慣用芥花子油)
7)豉油半碗(我習慣用蒸魚豉油)
8)鹽半茶匙

b)
干貝、蝦米浸軟,去水蒸十五分鐘,干貝放砧板上用菜刀拍偏壓成絲,蝦米可放入攪拌機攪碎(或用刀切碎)。

c)蒜頭、蔥頭各4兩(約140克)去衣後放入攪拌機攪(由於蒜頭、蔥頭過輕,所以要打開蓋,攪一陣停機用筷子攪一攪才可打成容)
或自行磨、切成容。
這過程~最好帶透明手套加眼罩

d)辣椒按個人接受程度切碎(我用了2兩約70克)。

e)下一碗油燒熱後放入蒜容、蔥容轉小火炒至香氣四散(幾分鐘),再下辣椒炒兩分鐘...再放蝦米粉、干貝絲炒兩分鐘(這時需要再落一碗油)...油滾後再落蒸魚豉油及鹽...再滾可熄火再炒一陣!

f)攤涷後可入樽放雪櫃,隔晚即可享用!

唔好以為咁多材料可以整半鑊XO醬,以上材料煮完剛好裝滿一分升柚子茶空樽!
可先行將各材料減半試煮...試過後可按個人喜好將各種材料比例更改!


港式香滑奶茶




對於奶茶真是又愛又恨, 愛它是因為香濃醒神, 恨它是減肥的天敵。 很久以前每天在外用早餐, 食一個相當之勁而且無益的早餐 - 沙嗲牛肉公仔麵配 "茶走"。 "茶走" 是什麼東東呢??
就是奶茶唔要花奶加入練奶, 每天都要食一個超標早餐, 我亦樂此不疲。何解會懂得飲 "茶走" 呢?? 連我自己也想不起來, 只知道飲 "茶走" 比較滑,  某些茶餐廳的奶茶沖得比較鞋口, 所以飲茶走比較滑口。

當年因為食呢個超標早餐慢慢開始肥起來, 後來決心戒掉這個重量級早餐。 過情真是十分辛苦, 一來習慣了食這個大份量早餐, 二來沒有了奶茶就好似道友一樣, 一整天好像無精打彩在打呵欠, 大家都知道打呵欠後一定會落眼淚水。 工作時又會釣魚, 足足要兩個星期才可以回復原狀戒除毒引。

近這大半年不知何時開始又再毒引發作, 每天都要飲一杯奶茶才安樂, 初時買三合一的奶茶沖飲, 試了好幾種都不是味兒, 之後試到二至三隻都可以 - 有益 x、 老 x 行、舊 x 場, 都是合我口味的。但是每日飲一杯又很快要再買, 而且我老公也喜歡飲更加快了飲用的速度, 所以最後自己開姑試沖。

港式的奶茶是由多種不同的紅茶葉混合一起, 所以大家到不同的茶餐飲的奶茶會有不同的差別。 開始買不同的茶葉及茶包回家自己混合起來, 因為普通的超市大多數都是茶包, 只有小數的紅茶葉賣, 所以我也有用上茶包。 可是沖出來還是差了一種的味道, 原來就是伯爵茶, 因為伯爵茶除了紅茶葉外還有佛手柑, 好味的奶茶就是靠佛手柑提供的香味, 這個是我在晤打晤撞的情況下試出來。

而奶方面我沒有用花奶, 因為花奶唔容易保存, 所以我改用了奶粉。 這個方法就要多謝我哥哥, 因為他也是在家沖咖啡的。 他很怕麻煩不想常常去超市入貨, 所以買一罐奶粉沖咖啡比較方便。 而我最初是用練奶沖但是因為很快就用完一罐又是怕煩, 當我知道用奶粉的做法因利成便用上囡囡的高丐低脂奶粉。 結果沖出來的效果非常好, 比起茶餐廳的不相仲而且還可以做到掛杯的效果。掛杯是什麼?? 就是當奶茶表面形成一曾皮就叫做掛杯。 而家幾時想飲就可以幾時沖, 而且只是阻大家幾分鐘的時間。

港式香滑奶茶

以例大約如下 (可按自己喜好將份量增減) 

伯爵茶包 1 份

西冷紅茶包 2 份

紅茶葉 (可以用 lixxxx) 2 份

沖法 : 保溫瓶或暖杯用熱水浸一浸, 加入三茶匙茶葉焗五分鐘 (一定要留意時間唔可以超時, 否則茶葉會變苦澀), 用茶隔隔去茶渣, 加入三殼高丐低脂奶粉, 再加糖適量即成。

P.S.

1. 第一次混合茶葉不過做太多, 可以記低份量試飲後再按自己喜好混合。

2. 如果腸胃唔好的朋友都是小飲為妙, 奶茶始終會削胃, 要飲的話加多一點奶及食飽才飲, 千萬唔好空肚飲。

3. 沖完的茶葉可以晒乾後, 可以放入雪櫃、鞋櫃或櫃桶作吸味用。

2008年6月4日星期三

煎豬肉餅



常常做蒸肉餅有點悶, 今次改為煎肉餅, 靈感是來自某一日在茶餐廳食過的午餐。 但是做出來的肉餅非常乾, 食時也沒有配上一點汁, 整碟
飯真是乾到很難啃。 食碟頭飯或多或少都需要配一點汁才完尾, 雖然連汁料食會比較肥, 但是沒有那一點點汁真是食不下嚥。 還自己做比較好, 想點就點。 還有一個小貼士如果想肉餅好食唔鞋口的話, 便要自己動動手啄。 因為肉檔用機攪會將豬肉撕碎, 而用人手啄的話就會做到肉碎是一細粒。

煎肉餅

半肥瘦豬肉 $10-15

馬蹄 8 粒

醃料 : 豉油、糖、粟粉、小許水份

半肥瘦豬肉啄碎, 加入馬蹄同醃料攪勻後將肉餅撻數下後, 放入雪櫃醃最小半小時後取, 將肉餅搓成乒乓球大小備用。起油鑊將肉餅放入後壓平, 煎至兩面金黃即成。

2008年5月25日星期日

家長教育師會的旅行



囡囡做的水晶香薰燭



大埔墟火車博物館


中文大學石雕 - 傳說中穿過這個石雕不能在這裡畢業的

昨天參加了家長教師會攪的旅行, 雖然行程很簡單, 但我喜歡行程不會太緊迫像參加一日遊那些趕鴨仔一樣, 天未光就要起身準備出發。 九點正在學校集合出發, 第一站火車博物館, 見到火車頭和我小時候曾經跟媽媽及婆婆坐過的火車卡便勾起我童年的回憶非常有親切感。 在這裡除了睇火車, 小朋友最喜歡踏著火車軌行, 還會在火車軌上玩 "長門人"。 之後去了中文大學醫肚, 食了一個非常普通的自助午餐。 之後去到一個很出名的石雕, 傳說中如果中文大學讀書的話, 從石雕底部穿過便不能在這裡畢業。 貪玩的小朋友當然見到石雕便二話不說就要穿過去,  但是家長們非常緊張拉著自己的兒女禁止他們穿過去, 當然我也不例外。

離開了中文大學後, 接下來我們到了粉嶺的香薰園睇薰衣草。 我心裡一早已知道應該不會見到如日本的香薰園一樣一望無際的薰衣草場, 只有幾行的薰衣草及其他香草。 園內最好賣的我相信就是這個自制水昌香薰燭。 以我所見所有小朋友都做了一個, 自己 D. I. Y. 配搭不同顏色的沙, 頂層放上幾粒小貝殼做點綴, 已經令小朋友開心一齊天。

接下來尾站到了位於粉嶺的環保教育中心, 坦白講到了那裡有幾多小朋友會認真地睇這些資訊, 所有小朋友只是當那裡是一個遊樂埸, 將場內可以按或轉的制全數推動著。

雖然今次只有幾個地方去, 但是囡囡玩得好開心, 因為可以自己 D. I. Y. 做小玩意, 大家覺得囡囡的制成品如何呢?

2008年5月18日星期日

柚子蜜排骨



就地取材的柚子蜜排骨, 相信很多朋友家裡都會有一樽柚子蜜, 冬天來一杯熱柚子蜜滋潤一下。 飲柚子蜜時我會將一條條的柚子食清光, 因為我
特別喜歡柚子的清香味道。平常因為趕時間總會將排骨用蒜蓉豆豉又或者酸梅麵豉醬蒸, 有時將之燜薯仔。 今次就有我喜歡的柚子味..... 甜甜地幾特別.....

柚子蜜排骨

排骨 $20-$25

柚子蜜 適量 

水 適量 

醃料 : 豉油、糖、粟粉、油

先將排骨用醃料醃最少 30 分鐘, 柚子蜜用小量水稀釋備用。 起油鑊將排骨爆炒至八成熟後, 再將稀釋的柚子蜜加入兜勻試味即成柚子蜜排骨。 如汁料太多可加粟粉水埋獻。

清蒸茄子伴麻醬



已經忘記了這個菜是在那裡學回來的, 好像是否在 bk 那裡學回來的。 大家對於茄子的食法各有不同, 有人說清蒸加豉油已經好好味, 有人說加麻醬更可口。 剛好家
裡有一樽上次用作做冷麵的涼伴醬汁, 便順手將之作為這道清蒸茄子的醬汁。 大家學會這個醬汁後也可作冷麵的涼伴醬用。

清蒸茄子伴麻醬

茄子 2 條

醬汁 : 麻醬 (可在專買粉麵的舖頭或超市買到)、豉油、糖、小許麻油適量

燒熱一鍋水後再將茄子切成條狀即放碟上馬上蒸 8-10 分鐘(因為茄子切開接觸空氣後會出現黑點), 將醬汁攪勻試味備用。

蒸好的茄子加入醬汁即成。

2008年5月17日星期六

致衷


向四川地震死難者致哀, 死去的人可以安息, 也希望生還的人可以將來可以得到幸福同快樂。 雖然我沒有宗教的信仰, 但是我會係內心默默向上天祈求, 可以再找到生還者。

本來今日想更新一下新菜色, 相信大家的心情跟我一樣, 是很沈重。 最初從電視上看到消息時雖然很震撼, 可是我沒流過一滴眼淚。 但是當每一天從報章裡看到有老師如何併死保護學生或者是父母如何身體去保護自己的小朋友, 不其然眼淚直流。 其中一則最令我動容的是一位好像是警察, 當發生地震後馬上跑到學校去找自己的小朋友, 當他找到小朋友時, 小朋友被埋在瓦礫裡面當時還活著, 由於當時還有其他小朋友被困在裡面, 而他自己小朋友埋得比較入同挖掘困難, 所以他選擇去救其他小朋友, 但是除著時間過去他自己的小朋友的聲音慢慢越來越弱...... 眼見自己的孩子欲救無從, 我想這位爸爸一定好心痛 。

2008年4月13日星期日

咸豬手炒飯



一個星期下來又係清雪櫃的時候, 將餸頭餸尾清一清...... 如果老公沒有回來食晚飯總會有餘下的餸, 其實我已經煮小了, 但係仍然會有餘下來的, 可能我和囡囡都不是大餸的人, 所以雪櫃或多或小都會隔夜餸。 今次有餘下了係吉之島買回來的"鴻星"
咸豬手, 每一次經過一定會一隻回來作晚餐。味道好好又不想浪費所以將佢切成粒加一些配料即成一個好味又簡單的炒飯。

咸豬手炒飯

咸豬手 適量

隔夜飯 2 碗

雞蛋 2 隻

蔥粒 適量

鹽 小許

將咸豬手切粒, 飯預先將佢打散 (比較容易炒), 起油鑊先將雞蛋炒散取出, 將油鑊加熱再加入飯用大火炒至乾身加入咸豬手兜勻後加入蛋碎及鹽調味, 最後加入蔥粒兜勻即可。

P.S. 炒飯時一定要全程大火將飯炒至乾身, 開始時會比較多水氣升上, 到後期開始乾身水氣會比較小, 才可加入其他材料。

迷上織冷衫



大家好..... 好耐都無 update 個 blog, 我就很像是人間蒸發左一樣。 有無掛住我呢, 其實呢段時間我做左織女(織冷衫), 自從做左織女之後就無再
update 呢個 blog, 自己都覺得有 d 可惜, 我都希望自己唔好咁懶, 我知道這個 blog 仍然有很人會睇, 我仍然會為大家帶來我煮過及學過的菜餚。 除了煮食以外我將會加入我做織女時織過的制成品就係 - 冷衫, 同大家分享。

呢個就我開始迷上了織冷衫的其中一件作品, 這個是用鉤針鉤出來的斗篷。 讀書時期常常見到媽媽織冷衫給我及哥哥, 當時年紀小向媽媽學習, 學的只是最普通及容易的織冷頸巾, 而冷衫是從來也沒有學過也不懂得如何睇圖織, 所以一直都沒有織過冷衫。

記得第一次織冷衫是打天才波, 織了一件冷背心給男朋友也即是而家我的老公, 手工真麻麻也都無見過他著, 到最近問老公時佢都話很似無見過。 對我來說也沒有相干, 因為織得真係唔見得人。 之後都無再織過, 到左囡囡出世以後, 我媽媽提起你會織冷衫(其實只能夠著在底不能外露)就織一件比囡囡。 買回來的始終無人手織的那麼暖, 我又想返正都是著在外衣之下, 織得不好也不打緊。 不過出奇地我又織得不錯, 只是織得比較手緊。 可能是我想織得比較好, 所以參考現成的冷衫再加睇書 (這本書是很久前買的只有織花樣及開夾位的沒有全件衫的圖那種), 我反覆去睇圖同織結果成功左。 之後隔一年便會織一件冷衫比囡囡, 不過仍是織冷背心。直到前年才試織有袖都很成功, 我發覺自己不論是煮食、織冷衫、電器或是學用電腦的軟件都幾有天份。 可能是因為我有一份永不放棄的精神, 當我迷上一樣東西的時間, 我便會勇往直前係都要做到為止我才會安心。