2009年1月29日星期四

燒雞扒 - 光波萬能煮食鍋(光波爐)



用左幾次光波爐今次算是幾成功, 起碼唔使唔熟, 雞皮的邊邊仲有小小脆. 今次我學了火石咁買左支 OK 汁, 另外買左燒肉用的汁, 自己又係度亂醃一通.
出黎味道又唔錯喎..... 呵呵!

燒雞扒 - 光波萬能煮食鍋

雞扒一大件

醃料 : 生抽, 糖, OK 汁, 燒肉汁

將雞扒用醃料醃一小時以上

光波 230 度 13 分鐘反面 250 度 4 分鐘.

爆谷 - 光波萬能煮食鍋(光波爐)



今次又學下 bk 媽咪咁用光波炸爆谷, 第一次可以親眼睇到佢
炸開個樣都幾得意...... 不過始終要回鍋, 感覺上好似一次過用鑊做方便得多. 

爆谷 - 光波萬能煮食鍋

爆谷豆 2 湯匙 (可在大間的超市買到)

光波爐 250 度 5 分鐘即, 之後用鑊加入糖至開始溶加入爆谷兜勻.

2009年1月28日星期三

叉燒 + 金沙骨 - 光波萬能食鍋(光波爐)



往年過年都是大年初一去拜年, 初三多數留在家中, 今年比較特別, 因為哥哥去了旅行初一才回港, 於是改了在初三才出動. 先去香港仔同伯父拜年,
之後去樂華村, 再去黃埔花園, 計埋自己係元朗出去, 真係黎環島一日遊.

回家時已經是六點多, 好在已經雪櫃有已醃好準備隨時練功用的材料, 所以今晚又練光波功有叉燒同金沙骨. 出爐時我時我同老公講, 叉燒的顏色唔似街買的紅, 佢話自己整又點用街買的. 叉燒仍然係差小小先熟, 原本我再光多 2 分鐘點知老公怕過火就出左爐, 結果最後都係入微波爐叮熟佢.

叉燒 - 光波爐做

梅頭肉 $20 (要帶一點肥)

醃料 : 叉燒醬, 生抽, 老抽, 糖

將梅頭肉用醃料醃一小時以上, 放過夜仲好

光波爐, 低架, 250度 10分鐘反面 5 分鐘 (我想下次要用 12 分鐘再反面 8 分鐘應該好 d) 又或者將梅頭肉切半, 薄一點應該會比較易熟..

金沙骨 - 光波爐做

金沙骨

醃料 : 生抽, 老抽, 喼汁, 糖, 生粉

光波爐, 低架 250 度 10 分鐘反面 5 分鐘

2009年1月27日星期二

烤羊架 - 光波萬能煮食鍋(光波爐)



烤羊架本來沒有想過今日午餐食, 預算是整叉燒, 點知老公第一句話係咪整羊扒, 咁好啦唯有整啦..... 當然都係要用光波爐及下功先得啦..... 整完之後發現一邊比較生, 因為一邊係厚小小, 一齊係薄小小, 所以要切開再光多一陣..... 下次都係切開光
波比較好又或者界開部份光. 不過味道就唔錯, 為食囡囡都話正, 最快食完就係呢碟.

烤羊架 - 用光波萬能煮食鍋做

烤羊架

醃料 : 生抽, 糖, 百里香, 豆寇粉, 小茴香粉, 油

先用醃料醃一小時以上過夜較佳

低架 250 度 13 分鐘反面再焗 5 分鐘.



焗腰果 (改用低溫)- 光波萬能煮食鍋(光波爐)




經過上次用高溫差小小出事, 今次改用低溫去做, 還有上次
我忘記了加油, 所以今次做出效果比一次的好. 食譜可參照之腰果食譜記得加油呀!!

180 度焗 4 分鐘再反面 3 分鐘即可.

2009年1月26日星期一

蒸蘿蔔糕+年糕 - 用光波萬能煮食鍋(光波爐)


用光波爐煎緊蘿蔔糕


再黎就係用光波爐煎年糕

見 bk 網友個個都話用光波爐煎糕, 我又學吓先. 唔知係我怕燶所以蘿蔔糕唔夠膽煎咁耐怕過光..... 所以唔夠香口同比較濕, 後尾我先發現個爐有個焗乾制, 早知就試下禁呢個制睇下咩效果啦..... 年糕其實德國寶食譜都有教係煎到差不多得先至搽蛋汁再煎, 我就無理佢照浸左蛋汁先煎.... 所以出黎的表面的蛋汁係有 d 燶左.

做法 : 高架+煎碟

煎蘿蔔糕 250 度 6 分鐘反面 3-4 分鐘

煎年糕 250 度 4 分鐘反面 2-3 分鐘

年尾行運+運桔行動



今年唔知發生咩事老公揀左盤大吉
很高呀......


估唔到年尾有運行
黃昏時間去了千色店走了一抽到兩個福袋及細獎兩個.

不知何故每年的年三十都是最忙的一天, 大掃除竟然做了好幾天.  囡囡也自己係度執房. 另外真係要讚下老公, 幫手抹窗跟住又拖地抹地, 攪了一個下午, 老公想去買鞋, 於是去了千色店走了一圈, 我和老公都侍人買了一對鞋, 老公仲買了一個疑似 i-phone 的電話 (有老細支助), 跟住去玩大抽獎, 抽磅數咭跟住就"畢"金仔去磅下, +/- 3 g 有福袋, +/- 5g 有利是封. 玩了 6 次, 有 2 個福袋及 2 套利是封. 福袋入面有油/果汁先生/低脂奶粉一包/珍寶珠一支. 年尾都有小小運行下幾好.

今晚上就做了燒雞, 蒸魚 及生菜, 每樣都留一點"扎"年, 跟住個個去沖澡, 十點多出門行花事, 今年勁多人行花市, 人迫迫都沒有買到什麼東西, 年宵入面見到有人玩小時候只會在麗園的掉楷磚, 我們也玩了一轉, 不過得個桔..... 不過唔緊要大家開心就得. 因為人太多太迫所以走到去賣桔的那一邊, 老公唔知仲咩事, 買了盤大年桔有半個人咁高, 今次正呀..... 我有很多桔用黎醃, 不過就要辛苦老公, 以往我地買細盤老公就一口氣托返屋企, 今次老公就分了幾要停一停先至可以托到反屋企..... 辛苦晒啦....老公.

烤雞 - 光波萬能煮食鍋(光波爐)



已反面的燒雞焗制中.......


大家見到完成後的樣子好似好得咁.... 
其實係失敗了 - 雞肶位仍有小小生.
似乎我日日都開爐用光波爐, 可能心急想很似 bk 媽咪咁制作不如的美食, 又或者是因為 7 日內有壞包換, 所以不停咁跟大家一齊練功.

大家有無睇下架下的銻紙, 這些都是雞本身的油, 原來平時食了很多油落肚, 現左用光波爐已經被光波爐迫了出來, 是否好得人驚呢?? 那裡最少有一至二湯匙油, 雖然是燒出黎, 但是入面真是非常滑.  不過我有小小失敗可能之前開得太大火所以肶位有小小生, 最後要再將雞肶再光多 5 分鐘才可以.

燒雞 - 光波萬能煮食鍋

三黃雞一隻 (冰鮮)

醃料 : 生抽, 老抽, 糖, 玉桂粉

上皮汁料 : 100g 醋, 麥芽糖 1 大匙

蜜糖

先用手壓胸至肋肋聲, 再將雞用醃料, 醃最小一小時, 過夜更佳, 燒熱一鍋水熄火, 取出隔水及印乾水份, 再用上皮汁料搽滿雞全身, 風乾一小時或用光波爐風乾 (今次我自己風乾, 因為有時間). 另我在雞表面桔了幾個孔, 讓雞皮的油可以流出....

光波爐用低架及加高圈

預熱 3 分鐘

250 度火 15 分鐘(過左 10 分鐘雞肶腳已經燶了, 所以轉火至 220 度再燒)

反面再燒 5 分鐘(出爐切時雞肶仍未熟透, 再光多 5 分鐘至全熟)

先燒雞胸, 之後反面再燒另一邊. 最後 2 分鐘加蜜糖燒一下....

下次我估要試下 200-220 度燒 20 分鐘看看效果如何.

2009年1月24日星期六

焗腰果 - 光波萬能煮食鍋(光波爐)



入左光波教之後又跟 bk 媽咪做腰果
我都幾勤力架......


可能火太大我見之前有人同 220 度
又有人用 180 度, 我又試下用中間做 200 度

我做這個腰果的時候都有考慮過用怎樣的度數做, 用 200 度都已經有小小怕, 下次試下用跟機的食譜做.... 不開油鑊炸感覺上健康得多, 有焗爐的時候都唔會自己焗, 係一班 bk 媽咪的帶領之下, 她們的成功比到我無比的力量跟住做.

焗腰果 - 光波萬能煮食鍋

印度腰果 150 g (係藥材舖買 $30/一磅)

1 公升水

2 茶匙海鹽

1/2 茶匙食用梳打
加小許油

先將水煮沸後加入海鹽煮溶熄火加入梳打粉後再加入腰果, 浸 2 分鐘取出隔水放涼.

光波爐高架 200 度光先 4 分鐘, 反面 2-3 分鐘見顏色 ok 即可.

不過感覺上火力大了一點, 下次可以試跟機 180 度焗 5 分鐘, 另外鹽部分可以加多小小味道偏淡.

2009年1月23日星期五

雞翼 - 光波萬能煮食鍋(光波爐)



今晚除了多春魚仲有雞翼....

效果唔錯, 不過我醃的時候重手一點比較咸, 邊邊有
小小好似 bbq 感覺, 究竟點先至可以整到脆皮?? 還是雞扒才可做到, 同事的媽媽做雞扒表皮非常脆. 等我又要試下做... 不過今次火力較得大左一點, 所以要不時轉火..

雞翼 - 光波萬能煮食鍋

雞翼用豉油,糖, 生粉醃至小半小時

光波爐用先 250 度 4 分鐘轉 220 度反面 4 轉 200 度 2 分後即成.

鹽燒多春魚 - 光波萬能煮食鍋做(光波爐)




今晚的晚餐當然係要再試用, 整了多春魚......




成品外觀尚可.

今晚當然是要練光波功啦..... 多春魚是之前有網友講過
頭同尾都很脆.... 但是我做出黎的不是太脆, 可能我買的多春魚比較大條所以做出黎只係尾可以做到脆, 但係頭就沒有那麼脆. 我呢我要好好修練先得. 老公提意下次加一點蜜糖會比較好味.

多春魚 - 光波萬能煮食鍋

多春魚 (佳寶買 $10 有 14 條)

洗淨抹乾用小小鹽及胡椒粉醃一醃..

250 度 面先焗用左 10 分鐘反面再焗 7 分鐘

新玩具做格格薯 - 光波萬能煮食鍋(光波爐)



貨到馬上清洗祈待已久的德國寶光波萬煮食鍋
跟住搵格薯做試驗品.


成品賣相不錯, 食時跟 KFC 賣的不相伯仲
囡囡係以高速將它們往肚裡送,
不消片刻只得一隻吉碟.



其實很久以前老公已經叫我買, 只是當初根本不知光波爐係吔東東. 直到係 bk 網友紛紛得到光波教教主火石大力推動, 及得到各位師姊繼續放毒, 終於我都要入教. 連帶公司同事都一齊中毒買左一部比媽媽用.....

今日送機黎到二話不說就要開機練功, 一如各位網友所講光波完之後同 KFC 的格格薯一樣, 不過比起 KFC 的健康得多, 因為唔使用油炸.....

最意外係廚房竟然有位放得落這個光波爐, 唔使放係廳.....



格格薯 - 用光波爐做

現成格格薯 (大昌有售 $6.3 一包)

250 度焗 10 分鐘

先焗 6 分鐘反面再焗 4-5 分鐘

光波爐 - 光波萬能煮食鍋




新玩具德國寶光波萬能煮食鍋, 好就要睇下佢有幾萬能同神奇

-左邊的加高圈及高低架是隨機附送的 - 可以燒唔同肉類或魚用
- 右邊的是廚寶是近期附送的黑色的是煎碟
- 有孔的是烘焙碟 - 焗曲奇/腰果/麵包之類用
- 有點像焗威風蛋糕的就是廚寶 - 可以做煲仔飯/焗蛋糕用



經過個多月被 BK 的網友日日的光波美食洗禮後, 講到咁神奇可以取代焗爐又唔熱氣, 還可以迫到肉類的油份出來, 食物仲可以做到外脆內軟, 結果當然是買一部回家玩. 經同事的幫忙後係工聯會 $950 包送貨, 由 1 月 19 日覆 1 月 22 日送貨後, 我個心好興奮急不及代已經去入貨買了很多食物回家預先醃好, 好讓光波爐到來的時候可以發功睇下光波爐有幾神奇. 不過好事多磨等了兩日都未再聯絡我送貨時間, 於是急唔住 1 月22 日早上打了電話去問也回覆我會於明天送貨, 今日會再通知時間. 到了下午工聯會通知話要 1 月23 號才可送貨, 我也問了那人是否一定有, 因為快要過年, 如果無就要到過年後才可以送貨, 這樣會浪費了我的假期. 好在 1 月 23 日真的送了來, 非常高興, 馬上清潔過光波爐就讓光波爐發功, 先試了 格格薯 見另一網誌.

除了在香港買德國寶賣, 也有網友在 yahoo 買國內做出口的光波爐, 還有可以在淘寶網買國內的光波爐, 但係記住在國內不是叫光波爐是叫熱波爐. 還有億世通的熱波爐 (這款同德國寶有分別用的時候是沒有光), 總之各式其式有平有貴, 大家可以按自己的需要去選擇. 還有一點如果淘寶網買的時候要留意是送貨前一定要叫買家試機才寄貨, 還有買家是要附運費 (有部份是不會寄貨到香港).

後記 : 光波爐真係好好用, 又方便小油煙, 焗出的肉類又可以迫油出來, 一個字正.

2009年1月8日星期四

煙肉火腿包 - 麵包機做



唔知係咪我接錯左深色
包包出爐比較深色及表包硬了一點.....


入面非常做得唔錯.....


又係度攪攪陣跟 bk 網友講開唔用牛油用普通煮食用的油也可以大麵包, 但是不建議蛋糕改用普通煮食用的油, 因為會失去牛油香味.

昨晚因為要開機做包包, 所以試下用煮食油取代牛油, 加餡料時我又無接情況做, 用麵包機做有餡食譜是待麵包機發出第一次咇咇聲才可以加入餡料, 有見上次做提子包時發覺提子好像攪拌不足, 所以提子未能平均在包內, 所以今我在麵包機第一次停頓時加入餡料. 今次都相當滿意.

煙肉火腿包 - 麵包機做

材料:
水 220 克
芥花子油 2 湯匙
高筋麵粉 350 克 (要過篩)
鹽 1.5 茶匙
糖 35 克
乾酵母 1 茶匙

餡料 : 煙肉及火腿合共大半飯碗

製法:

麵包機設定:程式 - 白麵包,麵包分量:500克,烘焙度:低度。



  1. 將所有材料依以上次序放入麵包機焗盆內,將焗盆放回麵包機內,按開始鍵。

  2. 當麵包機運作 5 分鐘後,在停止的 5 分鐘內,加入煙肉及火腿。

  3. 程序完成後,將麵包取出放涼架上放涼最少30 分鐘,切片。





2009年1月1日星期四

自家脆脆燒肉 (用豬插做)


終於敵不過 BK 媽咪最近日講夜講之後, 真係激起了我做燒肉的欲念. 不過仍然沒有激起買光波爐的衝動, 只是今次有衝動買個豬插方便做燒肉. 真是唔講
唔知用豬插真是非常方便, 以前做是用叉插比較辛苦, 因為叉子插的面積比較小, 所以要插不下幾百次, 但是用豬插就比效方法用力比好. 

整燒肉不在乎味道, 只在乎表面烤得脆脆又鬆化, 坊間有不同做法, 大致是先出水 8 - 10 分鐘, 之後取出再過冷河, 跟住用豬插插豬皮, 之後再加入醃料再風乾最少四小時, 之後再入焗可以 加鹽壓豬皮面的做法或直接烤. 今次就用了直接烤的方法做. 因為鹽壓頂的做法, 如果在清除鹽時不小心跌了鹽入去, 會令燒肉好鹽.

自制燒肉 (用豬插)

腩肉  一條 (最好用比較粗身或一件正正方方)

醃料 :

玫瑰露酒小許 (原食譜是用紹興酒因為剛用完)

沙薑粉小許

粗鹽小許

先將腩肉出水 8-10 分鐘, 取出過冷河放涼, 印乾水份後用豬插, 插豬皮表面直至感覺到皮是軟軟的 (未插前是比較硬),  再搽上酒後, 再加鹽及沙薑粉拌勻, 再風乾最少四小時, 預熱焗爐 240 度 (可以低小小 230 度) 用錫紙包好腩肉只露出豬皮部份, 先焗 40 分鐘, 再轉 210 度焗大約二十分鐘左右或見皮爆得靚即可, 或只用上火烤的功能見表面已經爆得靚即可.