咸豬手炒飯

一個星期下來又係清雪櫃的時候, 將餸頭餸尾清一清...... 如果老公沒有回來食晚飯總會有餘下的餸, 其實我已經煮小了, 但係仍然會有餘下來的, 可能我和囡囡都不是大餸的人, 所以雪櫃或多或小都會隔夜餸。 今次有餘下了係吉之島買回來的"鴻星"
咸豬手, 每一次經過一定會一隻回來作晚餐。味道好好又不想浪費所以將佢切成粒加一些配料即成一個好味又簡單的炒飯。

咸豬手炒飯

咸豬手 適量

隔夜飯 2 碗

雞蛋 2 隻

蔥粒 適量

鹽 小許

將咸豬手切粒, 飯預先將佢打散 (比較容易炒), 起油鑊先將雞蛋炒散取出, 將油鑊加熱再加入飯用大火炒至乾身加入咸豬手兜勻後加入蛋碎及鹽調味, 最後加入蔥粒兜勻即可。

P.S. 炒飯時一定要全程大火將飯炒至乾身, 開始時會比較多水氣升上, 到後期開始乾身水氣會比較小, 才可加入其他材料。